＜佇普悠瑪列車內面＞
選文
注釋
題解
這篇散文是「2018 臺灣文學獎創作類臺語散文金典獎」的得獎作品。作者用臺灣歌謠〈港邊惜別〉內面的「戀愛夢」、「青春夢」、 「自由夢」三个主題，共〈佇普悠瑪列車內面〉這篇文章連貫起來。 遮--的文字嘛會使講是作者對大學時代拄認捌臺灣文學、到伊去臺文系教學，對少年到中年差不多 20 冬來的一寡心得
這篇課文是對〈佇普悠瑪列車內面〉「自由夢」的後半段，接續 「戀愛夢」所節錄出來的。佇文章內底，作者講出伊咧追求自由的時陣，家己的無知、疑問佮憂愁，嘛有伊對土地的思慕，佮伊毋捌停睏的走揣。講著戀愛，雖然伊無閣狂熱，毋過猶原堅信愛情……。
作者
呂美親，1979 年生，嘉義縣人。嘉義技術學院植物保護科、東海大學中文系畢業、清華大學臺灣文學所碩士，日本一橋大學言語社會研究科博士，臺灣師範大學臺灣語文學系助理教授。捌得過吳濁流文學獎新詩正獎、臺南文學獎臺語小說佮臺語詩首獎、打狗鳳邑文學獎臺語詩首獎、臺灣文學獎創作類臺語散文金典獎等多項。嘛捌參與製作賴和音樂專輯《河》，共編《臺語文運動訪談暨史料彙編》、出版臺語詩集《落雨彼日》、編譯《漂泊的民族王育德選集》
問題與討論
1.是按怎作者會用〈佇普悠瑪列車內面〉來做伊的題目？敢有啥物較深入的意義？
2.「夢」這个字一直出現佇文章內底，請問作者有啥物夢？伊所「眠夢」的代誌，敢有啥物特別的？佮未來敢有啥物關連？
賞析
這篇詩化的散文，將感情佮珠淚攏貯入去伊人生的故事內底；這篇嘛親像小說，呈現作者佇茫茫渺渺的性命溪河中，走揣家己虛無佮現實交纏的人生夢想。
作者用〈佇普悠瑪列車內面〉做題目，將臺灣自日本時代開始到今，臺灣社會大眾追求自由化的過程內底，逐家做伙做的「青春夢、 自由夢、戀愛夢」，攏囥佇這幫「普悠瑪(Puyuma)」火車內面。普悠瑪(Puyuma)是臺灣原住民族—卑南族的一个部落，作者用代表臺灣原住民族的火車名，來象徵臺灣過去的歷史，閣用三大主題、三个夢來貫穿規篇文章。
作者用伊坐火車的過程，用座位的位置，描寫經過磅空的氣氛，予家己的想像穿越時空，轉去大學時代的青春，描寫家己語言覺醒的經驗；國族認同覺醒的痛苦，臺灣追求自由的過程；以及應該是真激動，煞感覺愛甲親像喘氣遐爾自然的戀愛夢。這三个夢，予作者寫出 一篇成熟、結構完整、像詩嘛像小說、有情嘛有珠淚的文章，予臺灣文學的散文行入一个新的寫作境界，真值得咱高中同學來閱讀、學習。
作者認為，這篇文章閣有伊得著這个獎，袂輸是佮伊家己的少年、青年時代告別。普悠瑪列車載作者去揣伊的學生，普悠瑪列車毋但載著作者的夢想，嘛共作者過去所「眠夢」的代誌接紲、傳承予新的一代。坐佇普悠瑪列車內面，作者的「眠夢」，予伊看著過去的歷史， 嘛予伊看著未來的希望。
學習單
|
《港邊惜別》Káng-pinnSioh-piat 詞：陳達儒 TânTat-jû 曲：吳成家 NgôoSîng-ka |
|
| 夢 |
予人來拆破 hōo-lâng lâi thiah-phuà 送君離別啊 sàng kun lī-piat--ah 港風對面寒 káng-hong tuì bīn kuânn 真情真愛 tsin-tsîng tsin-ài 爸母無開化 pē-bú bô khai-huà 毋知少年啊 m-tsai siàu-liân--ah 熱情的心肝 jiat-tsîng ê sim-kuann |
| 夢 |
予人來所害 hōo-lâng lâi sóo hāi 快樂袂透啊 khuài-lok buē thàu--ah 隨時變悲哀 suî-sî piàn pi-ai 港邊惜別 káng-pinn sioh-piat 天星像目屎 thinn-tshinn tshiūnn bak-sái 傷心今暝啊 siong-sim kim-mî--ah 欲來分東西 behlâihun tang-sai |
| 夢 |
予人來拍醒 hōo-lâng lâi phah-tshínn 美滿春色啊 bí-buán tshun-sik--ah 變成烏陰天 piàn-sîng oo-im-thinn 港邊海鳥 káng-pinn hái-tsiáu 毋知阮分離 m-tsai gún hun-lī 聲聲句句啊 siann-siann kù-kù--ah 吟出斷腸詩 gîm tshut tuān-tng-si |