＜院士的考驗＞
選文
注釋
題解
無論是文學作品抑是藝術創作，每一个創作者的心內，攏有伊家己對藝術追求的標準佮想法，若是創作者只有誠好的手藝，煞無追求藝術作品的心，作品就會失去藝術價值。若是用追求藝術意義的角度來看，作者胡長松用〈院士的考驗〉這篇小說來表達伊對藝術追求的態度。
文中A先生是「碎形幾何藝術的最高院士」，嘛是小說內底「藝術上懸層級」的代表，伊認為家己已經無進步的空間矣，A先生共主角「我」問講對伊作品的看法。「我」只是順A先生的話尾來回答，「我」並無去深入了解「碎形幾何藝術」，嘛無藝術的敏感度，就贊成院士A先生將作品毀掉，就按呢，佇院士的專業考驗之下，院士就共「我」淘汰矣。
作者
胡長松，1973年生，高雄市人。國立清華大學資訊所碩士。捌擔任電信公司新創服務產品開發部門主管。1995年伊開始佇《台灣新文學》發表作品，1997年發表長篇小說《柴山少年安魂曲》。自從2000年，伊開始用臺文創作，從此以後伊就大膽使用各種現代西方主義的寫作技巧，予臺語文學跳脫古早保守的文風，開創一種新奇現代的新風格，就按呢，伊的作品一再受著肯定佮呵咾，予胡長松更加確定家己的寫作路線。2008年〈金色島嶼之歌〉得著臺灣文學獎本土母語創作－臺語小說金典獎，仝一冬出版伊的頭一本臺語詩《棋盤街路的城市》。其它的著作有臺語小說集《槍聲》、《燈塔下》。伊捌做過《台灣e文藝》以及《台文戰線》的總編輯。嘛捌得著王世勛文學新人獎、海翁臺語文學獎小說類正獎、吳三連獎。
臺語文學評論者方耀乾認為伊的「臺語小說深具厚實的寫實基礎，主要書寫二二八事件；伊的詩追求形象的多彩燦爛。是新一代臺語文學的重要小說家」。
問題與討論
1、藝術欣賞是愛根據家己的喜愛，抑是愛根據大眾的想法？請同學說出家己的想法。
2、藝術的標準是按怎設定的？小說內底的「院士的考驗」敢是藝術唯一的一條路？小說內底的「我」同意院士A先生所提出的「將作品毀掉」，敢有適當？
3、生活當中會搪著誠濟問題佮考驗，若是有朋友共你講「我做袂到，我無想欲努力矣」，請問你會予伊啥物建議？
賞析
文學作品佮每一項藝術創作，佇作者的心內攏愛有創造性、藝術性，若無就會變成是一个無性命的模仿品，失去藝術性。作者胡長松用〈院士的考驗〉這篇小說來表達伊家己對藝術追求的態度。
本文大約會當分做四大段，咱會當對這四段看著佇院士A先生按怎用專業考驗共主角「我」淘汰的。
第一段，是咧寫小說內底的主角「我」已經通過「三度碎形重湠」的鑑定，有機會參加國家委員會的一寡外圍會議。小說閣寫著一个國家文明的強弱是佮「碎形幾何藝術發展的深度有絕對的關係」，毋過會有真濟「輕浮派的理論家」會來打壓碎形幾何藝術。第一段文字，將小說的主角「我」紹介出場。
第二段講著A先生，是「碎形幾何藝術的最高院士」，嘛是「七度碎形重湠」優秀作品的作者。院士這个作品結構完整，而且對每一个角度看攏誠有趣味，會使講無任何敗筆。小說內底對院士A先生的作品呵咾甲會觸舌，無一屑仔缺點，予人真想欲去欣賞這个作品。
第三段，小說利用「國際委員會」來為「七度碎形重湠」做評價：「佇作品裡同時展現上帝創造的偉大奧妙、對全人類的愛、佮鄉土感情的深度，是人類精神成就的重要里程碑。」，小說內底將「七度碎形重湠」形容做是上蓋完美的藝術品。
第四段，就是小說內底上高潮的部份矣。
小說佇這段內面有誠濟對話，會當呈現出「我」的程度。
像「唉，老弟啊，毋是無缺點，我共你講，有一个誠大的缺點，愛到你像我按呢的時，你就看會出來。」這是咧講，「我」猶未達到院士的層級，愛等到「我」達到伊彼款程度，才看會出缺點。
主角「我」有講這句話：「毋管按怎，做一个決定總是著的。你若感覺按呢，就應該將伊毀掉。」雖然這是順院士A先生的話來講的，小說隨安排A先生講：「老弟啊，這是一个考驗。碎形幾何藝術，是一門團體精神的藝術，嘛是一門面對缺點的藝術，每一个準備欲進入第四度碎形重湠技術的人，基本攏愛先瞭解這件代誌。」佇小說內面的「我」，一點仔都無思考，無團體精神、無面對缺點，無夠謙卑，無看著作品其中的奧妙精華，無想欲面對考驗，就隨贊成院士A先生的話，想欲共作品毀掉。院士聽了當然嘛哈哈大笑，因為伊知影主角「我」就是無了解「碎形幾何藝術」的媠佮精髓(tsing-tshué)，無達到藝術家的程度，佇小說當中的「我」，正正就是第一段內面所寫著的「輕浮派的理論家」，會打壓、毀掉「碎形幾何藝術」。
咱看這篇小說，咱會想講，追求藝術境界應該愛到啥物地步？作者胡長松佇這篇小說內底，呈現家己對文學作品藝術追求的執著，藝術的境界是永無終止的。咱會使講，佇這篇小說當中，「院士」象徵一个藝術的標準，院士的級數就是藝術的層次，佇作者的心內，藝術是矛盾的，無「上好的作品」，作品永遠有無限的藝術性會當追求，就算講已經達到「七度碎形重湠」上懸的藝術層級，伊猶原感覺家己有缺點，毋過愛等到咱有達到「彼款程度，才看會出缺點」。
學習單
重湠遊戲：
小說內底寫著：「七度碎形重湠」是佇每一个單元內面鑲入一重小單元結構群，這个小單元結構群的每一个單元紲落閣對內面湠，按呢，每一个小單元就閣對更加精巧的內面湠入去，一重湠過一重，總共是七重。請根據遮的文字，利用下面任何一个圖形，根據家己的想像，畫出家己心中的「七度碎形重湠」。
|
○ △ □ |
|
|