〈毋通嫌臺灣〉是林央敏佇1987年寫的一首詩，伊寫這首詩的時陣才32歲，嘛是伊思想轉變、臺灣意識發穎的時陣。1987年嘛是臺灣解除長期戒嚴的年代，規个臺灣佇政治、社會、文化各方面攏有真大的改變，嘛是文學沓沓仔行入臺灣主體意識的年代。

      林央敏捌按呢提起：「彼个時陣的臺灣人，對家己無自信，對臺灣沒有深刻的疼心，這種現象不應該存在。」林央敏強調：「臺灣若真正無好，咱就應該愛去改善，予伊愈來愈好！臺灣若好，咱就愛繼續拍拚，予伊維持甲愈好，這是做一个臺灣人，對這塊土地的責任。」

      〈毋通嫌臺灣〉這首詩予音樂家蕭泰然譜做交響樂曲，常在有樂團演奏，感動真濟人。1991年流行歌星許景淳以這首〈毋通嫌臺灣〉，得著金曲獎台語歌后，這首歌的作詞者林央敏，嘛得著彼年的金曲獎台語作詞人。林央敏表示：「我雖然得著金曲獎台語作詞人獎，但是我無去領獎，我感覺獎的意義是對個人。毋過，我感覺國家閣較重要，這片土地閣較重要。」

      林央敏， 1955年出世，臺灣嘉義縣人。省立嘉義師專、輔仁大學中文系畢業，捌擔任國小教師、台語文推展協會會長、靜宜大學中文系兼任講師、台文戰線社長、台灣筆會理事、海翁台語文教育協會常務理事。文學作品捌得著聯合報文學獎首獎、榮後基金會台灣詩獎、巫永福評論獎、新聞局金曲獎第一屆台語歌曲最佳作詞人獎……等多項文學獎。1983年開始台語寫作，是少數由中文迒入台文寫作的作家之一。代先提倡台灣民族文學，是戰後台語文學運動的倡導作家佮台語文學理論的主要建構者。

      林央敏的作品風格變化真濟，融合東西方寫作技巧，包括詩、散文、小說、劇本、評論、雜文、台語字典、作曲與電腦軟體等，會使講是全方位的作家。作品入選詩、散文、小說、評論的各種選集八十外種，也捌選入小學、中學佮大學的教科書當中，閣有一寡作品捌翻譯做英、日文發表佇外國書刊。林央敏的作品內底有一部九千逝、十一萬字的《胭脂淚》這首詩是台語文學的第一部史詩(EPIC)，也是台灣文學史上長的詩篇。詩作〈毋通嫌台灣〉被音樂界譜做24種無仝的樂曲，對催化台灣人的意識佮民主運動攏有足深的影響。

1.這首詩號名做〈毋通嫌臺灣〉，內容真短、使用的文字嘛真淺白，煞得著真濟人的肯定，並且譜成音樂曲咧傳唱，你認為是按怎？請講出你的理由佮看法。

2. 這首詩的第一段有這句「土地雖然有較狹」，請你去查詢咱臺灣的土地佮人口數的比例，佮世界各國的比較，講看覓是按怎作者會寫出這句「土地雖然有較狹」的理由佮原因。

3.這首詩的第二段有「果子的甜，五穀的芳」的詩句，請同學去揣相關的資料，佮逐家分享咱臺灣產量前三名的果子佮五穀的名稱。

4. 這首詩的第三段有「雖然討趁無輕鬆」的詩句，佮傳統俗諺所描述的「臺灣錢，淹跤目」敢若有衝突，你認為作者是按怎欲按呢寫？請講出你的看法。

      〈毋通嫌臺灣〉是一首字數簡短、充滿民謠風的臺語歌詩。攏總分做三葩，每一葩有五逝。規首詩呈現出形式工整、押韻順喙、好記好唸的歌詩風格。

      拄開始看這首詩，會感覺伊的用字簡單、描述的內容嘛真表面，講的攏是咱一般人對臺灣的基本認識。毋過，詳細共加唸幾若擺了後，會發現作者佇語言的節奏、歌詩的音樂性這方面有下真濟苦心去經營，才有法度佇短短的篇章內底，建立容易唸唱的音樂特色。嘛成做後來受眾多音樂家提來譜做音樂作品的因緣。

      對作品的本身來看，每一葩的第一句分別是「咱若愛祖先」、「咱若愛囝孫」、「咱若愛故鄉」就是一種對祖先佮囝孫這種血緣的連結，紲咧閣對飼養咱所有臺灣人的土地的連結，使咱對伊的感情佇短短的文字內底就予叫醒。閣來，讀者就隨綴作者的文字進入「阿爸的汗，阿母的血」所種作的田園，「土地雖然有較狹」畢竟嘛是爸母的血汗沃落的土地，咱哪會當共棄嫌咧？

      第二葩紲接第一葩的理路，「土地雖然有較狹」，猶原「也有田園也有山」，所以「果子的甜，五穀的芳」、「予咱後代食袂空」，彼就若親像講爸母辛苦討趁，飼養囝兒序細，就算無山珍海味，總嘛無共咱枵著，咱哪會當共棄嫌咧？

      第三葩順前兩葩的表現，這个飼養咱幾若代人的土地，毋管當初咱的祖先對佗位來的，這塊土地已經是咱所有人的故鄉矣。就算這塊土地有足濟缺點，「雖然討趁無輕鬆」總嘛是飼養咱的土地，徛佇感情的角度，咱哪通共棄嫌咧？只有「認真拍拚，前途有望」，才會予「咱的幸福袂輸人」。

      這首詩佇1987年發表就共臺灣人對這塊土地的感情引𤆬出來，因為佇早期兩岸對立的年代，攏共臺灣當做是反攻大陸的跳板，就算伊飼養眾多臺灣的百姓，猶有真濟統治階層無共這塊土地當做是家己安身立命的故鄉，致使濟濟臺灣人存在對家己無信心的現象。真濟人若有機會就欲出國留學，甚至提著學位就留佇當地釘根落塗，永遠無欲轉來臺灣，欠缺對咱土地的疼惜，這是足可惜的現象。

      臺灣有一句俗語講：「爸母閣較䆀，囝兒嘛無嫌爸母䆀！」作者寫這首詩就是欲鼓勵臺灣人徛佇愛鄉、愛土的精神，毋通棄嫌這塊飼養咱的土地。故鄉有缺點，咱愛做伙拍拚，予伊愈來愈好，毋是共伊棄嫌，予伊成做世界的孤兒，這嘛是作者上重要的向望。

1.學習任務—現代詩仿作，〈毋通嫌OO〉

請各位同學按照作者〈毋通嫌臺灣〉的格式，照各人故鄉的無仝，模仿改寫做類似的詩，括號內底是一定愛改寫的部份，完成了後才閣用閩南語朗讀予逐家聽看覓。

〈毋通嫌        〉

咱若愛祖先

請你毋通嫌（    ）

（    ）雖然有較（    ）

（    ）的汗，（    ）的血

沃落鄉土滿四界

咱若愛囝孫

請你毋通嫌（    ）

也有田園也有山

（    ）的甜，（    ）的芳

予咱後代食袂空

咱若愛故鄉

請你毋通嫌（    ）

雖然（    ）無輕鬆

認真（    ），（    ）有望

咱的幸福袂輸人